2026 ஆண்டு ஆலோசனைக் கூட்டத்தின்போது, அக்டோபர் 13 அன்று, செவன்த்-டே அட்வென்டிஸ்ட் திருச்சபையின் வட ஆசிய–பசிபிக் பிரிவின் (NSD) தலைவராகப் போதகர் கிம் சன் ஹ்வான் தேர்ந்தெடுக்கப்பட்டார்.
உலகத் தலைமையகத்தின் (GC) பொதுப் பேரவைக் கூட்டங்களுக்கு இடைப்பட்ட காலத்தில் நியமனக் குழுவாகச் செயல்படும் NSD செயற்குழு, கூடி ஆலோசித்து, கிம் அவர்களை GC செயற்குழுவுக்குப் பரிந்துரைத்தது. NSD செயற்குழுக் கூட்டத்தில் கலந்துரையாடலைத் தொடங்குவதற்கு முன்பு, GC தலைவர் போதகர் எர்டன் கோலர், பொறுப்புக்கூறல், வெளிப்படைத்தன்மை மற்றும் நியாயத்தன்மையின் அவசியத்தை வலியுறுத்தினார். பின்னர் இந்தப் பரிந்துரை GC செயற்குழுவிடம் முன்வைக்கப்பட்டது. உலகின் பல பகுதிகளைச் சேர்ந்த பிரதிநிதிகள் அவரது நியமனத்தை அங்கீகரித்தனர்.
அக்டோபர் 9 அன்று GC செயற்குழுவால் பதவி விலகல் ஏற்றுக்கொள்ளப்பட்ட போதகர் காங் சூன் கியின் இடத்தில் கிம் பொறுப்பேற்கிறார். ஒன்பது நாடுகள் மற்றும் பிரதேசங்களில் திருச்சபைப் பணிகளை மேற்பார்வையிடும் இப்பிரிவில் ஏற்பட்டிருந்த தலைமைப் பதவி வெற்றிடத்தை அவரது தேர்வு நிரப்புகிறது. இப்பிரிவின் எல்லைக்குள் ஏறத்தாழ 700 மில்லியன் மக்கள் வாழ்கின்றனர். இவர்களில் 365,000க்கும் மேற்பட்டோர் அட்வென்டிஸ்ட் திருச்சபை உறுப்பினர்கள்.
தாம் தேர்ந்தெடுக்கப்பட்டமை குறித்து கருத்துத் தெரிவித்த கிம், இப்பிரிவு எதிர்கொள்ளும் சவால்களை ஏற்றுக்கொண்டதுடன், தேவனுடைய வழிநடத்துதலில் தமது நம்பிக்கையை வெளிப்படுத்தினார்.
“எமது பிரிவு பல சவால்களை எதிர்கொள்ளும் இந்தக் காலத்தில் இப்பொறுப்பை ஏற்கும்போது, தாழ்மையுடன் கூடிய உணர்வும் சற்று அச்சமும் எனக்கு ஏற்படுகின்றன,” என்று கிம் கூறினார். “இருப்பினும், ‘தேவனுடைய வரங்களும் அவருடைய அழைப்பும் திரும்பப் பெறப்படுவதில்லை’ என்ற ரோமர் 11:29இன் வாக்குறுதியை நம்பி, இந்த அழைப்பை ஏற்றுக்கொண்டுள்ளேன்.”
“முழுமையாக தேவனைச் சார்ந்திருந்து, அவருக்கும் அவரது திருச்சபைக்கும் உண்மையுடன் சேவை செய்ய என்னால் இயன்ற அனைத்தையும் செய்வேன்,” என்று அவர் தொடர்ந்தார். “இந்தப் பொறுப்பை நிறைவேற்றும் எனக்காக நீங்கள் ஜெபிக்குமாறு தாழ்மையுடன் கேட்டுக்கொள்கிறேன்.”
கோலர், கிம்மின் தேர்வை வரவேற்றதுடன், நற்செய்திப் பணிக்கான அவரது அர்ப்பணிப்பையும் சிறப்பித்துக் கூறினார்.
“அவர் மிகுந்த சமநிலையுடன் செயல்படும் ஒரு தலைவர். நற்செய்திப் பணியிலும் அவர் உறுதியான கவனம் செலுத்துகிறார்,” என்று கோலர் தெரிவித்தார். “இந்த இரு பண்புகளும் இக்காலத்தில் திருச்சபைக்கு மிகவும் முக்கியமானவை.”
திருச்சபைத் தலைமைத்துவ அனுபவம்
கிம் அண்மைக்காலம் வரை எகிப்து மிஷன் பிரதேசத்தின் தலைவராகப் பணியாற்றினார். 2025 ஆகஸ்ட் மாதத்தில் அவர் அப்பொறுப்பை ஏற்றார். முப்பது ஆண்டுகளுக்கும் மேலான போதக மற்றும் நிர்வாக அனுபவத்துடன் அவர் தனது புதிய பொறுப்பை ஏற்கிறார்.
எகிப்தில் நியமிக்கப்படுவதற்கு முன்பு, NSDஇல் பல தலைமைப் பொறுப்புகளை வகித்தார். அட்வென்டிஸ்ட் மிஷன், பொதுமக்கள் விவகாரங்கள் மற்றும் மதச் சுதந்திரம் (PARL), அட்வென்டிஸ்ட் பொதுநிலையினர் சேவைகள் மற்றும் தொழில்கள் (ASI) ஆகிய துறைகளின் இயக்குநராகப் பணியாற்றினார். மேலும், 2021 முதல் 2022 வரை இப்பிரிவின் இணைச் செயலாளராகவும் சேவையாற்றினார்.
கிம்மின் சர்வதேச அனுபவத்தின் மதிப்பையும், அவரது புதிய பொறுப்புகளுக்கு அது வழங்கும் பரந்த பார்வையையும் கோலர் வலியுறுத்தினார்.
“வட ஆசிய–பசிபிக் பிரிவிலும் எகிப்து மிஷன் பிரதேசத்திலும் பணியாற்றிய அனுபவம், திருச்சபையைப் பற்றிய உலகளாவிய பார்வையை அவருக்கு வழங்கியுள்ளது,” என்று கோலர் கூறினார். “உலகளாவிய திருச்சபையுடன் தொடர்பைப் பேணியவாறு இப்பிரிவை வழிநடத்த இது அவருக்கு உதவும்.”
கிம் முன்னர் மேற்கு–மத்திய கொரிய மாநாட்டைச் சேர்ந்த இல்சான் ஆங்கிலத் திருச்சபையின் தலைமைப் போதகராகப் பணியாற்றினார். கொரியாவில் உள்ள செவன்த்-டே அட்வென்டிஸ்ட் மொழிப் பள்ளியிலும் தலைமைப் பொறுப்புகளை வகித்தார். அங்கு செயற்குழுச் செயலாளராகப் பணியாற்றிய பின்னர், பிலிப்பைன்ஸில் உள்ள அதன் மொழி மையத்தின் இயக்குநரானார்.
PARL இயக்குநராக இருந்த காலத்தில், ஓய்வுநாள் கடைப்பிடிப்புக்கு ஏற்ப வசதிகளை வழங்குவது தொடர்பாக, 2019இல் தென் கொரிய உச்ச நீதிமன்றம் வழங்கிய முக்கியத்துவம் வாய்ந்த தீர்ப்புடன் தொடர்புடைய பணிகளில் கிம் ஈடுபட்டார். இந்த வழக்கு, தனது மதக் கடைப்பிடிப்பின் காரணமாக மாற்றுத் தேர்வு அட்டவணையைக் கோரிய அட்வென்டிஸ்ட் மருத்துவ மாணவர் ஹான் ஜி மானைச் சார்ந்தது. தென் கொரியாவில் ஓய்வுநாளைக் கடைப்பிடிப்போரின் மதச் சுதந்திரத்தைப் பாதுகாப்பதில் இத்தீர்ப்பு ஒரு முக்கிய முன்னேற்றமாக அமைந்தது.
கிம், தென் கொரியாவின் சஹ்மியூக் பல்கலைக்கழகத்தில் இறையியலில் இளங்கலைப் பட்டம் பெற்றார். பிலிப்பைன்ஸில் உள்ள அட்வென்டிஸ்ட் சர்வதேச உயர்கல்வி நிறுவனத்தில் (AIIAS), புதிய ஏற்பாட்டு ஆய்வுகளைச் சிறப்புப் பாடமாகக் கொண்டு சமயவியலில் முதுகலைப் பட்டம் பெற்றார். அண்மையில், சஹ்மியூக் பல்கலைக்கழகத்தில் நற்செய்திப் பணி மற்றும் செயல்முறை இறையியலில் முனைவர் பட்டத்தையும் நிறைவு செய்தார்.
கிம்மின் மனைவி பார்க் சூக் ஜா. இவர்களுக்கு வயது வந்த, திருமணமான இரண்டு மகன்களும் இரண்டு பேத்திகளும் உள்ளனர்.
